Kryeministri irakian, Hajdar el-Abadi, ka lajmëruar për nisjen e një ofensive të madhe për marrjen e qytetit të Felluxhes në provincën e Enbarit. Felluxhe ishte i pari qytet që do të binte në duart e ISIS-it në janar të vitit 2014, duke mbetur një prej dy fortesave të tij në Irak.
“Jemi këtu për të lajmëruar se flamuri irakian do të valëvitet shpejt në qiellin e Felluxhes,” deklaroi kryeministri i Irakut, çka u pasua me bombardime mbi qytet.
Felluxhe është vetëm 50 kilometra në perëndim të Bagdadit, dhe pritet që të ketë luftime të ashpra për marrjen e tij.
Banorët e qytetit janë lajmëruar prej ditësh që të largohen. Për ta do të ketë korridore për ta lënë qytetin. Ndërkohë, ushtria irakiane ka njoftuar se ata që nuk kanë mundur të largohen duhet të nxjerrin flamuj të bardhë mbi shtëpitë e tyre.
Mësohet se 75.000 civilë kanë mbetur të mbërthyer në qytet, me forcat e ISIS-it në njërën anë, e të ushtrisë irakiane në anën tjetër.
Felluxhe ka patur 300.000 banorë para luftës. Ai njihet ndryshe dhe si “qyteti i minareve dhe nëna e xhamive.” /tesheshi.com/
