Gjermania bënte të ditur në gusht të këtij viti se kishte në plan ta tërhiqte misionin e saj të mbrojtjes kufitare në Turqi. E sipas raporteve, kjo lëvizje lidhej me kostot materiale dhe personelin e shumtë, e jo me ndonjë reagim politik.
Ministria gjermane e Mbrojtjes njoftonte asokohe se 250 ushtarët gjermanë dhe sistemi raketor “Patriot” do ta linin Turqinë kur të përfundonte mandati, në fund të janarit të vitit 2016.
Kështu, raportohet se ka nisur tashmë largimi i këtij sistemi raketor nga Turqia, gati tre vite pas mbërritjes së tij.
Një anije me raketat Patriot është nisur të martën drejt Gjermanisë nga porti turk i Iskënderunit.
Gjermania do t’i dislokonte këto sisteme raketore në janarin e 2013-ës, duke vepruar në kuadër të NATO-s, për t’i paraprirë çdo kërcënimi të mundshëm nga Siria.
Tërheqja e raketave Patriot vjen në një kohë kur tensioni është përshkallëzuar në rajon, e situata këtej e andej kufirit turk është e nderë. /tesheshi.com/
