Thotë se të gjithë janë për ushtri, por ajo të krijohet në bashkëpunim me aleatët ndërkombëtarë, SHBA-në dhe NATO-n, në të kundërtën mendon se rrezikohet partneriteti me Aleancën Euro-Atlantike.
Është ky deputeti i pavarur Ilir Deda, i cili beson se qeveria nuk do e procedojë menjëherë ligjin për FSK-në në Kuvend edhe përkundër kërkesës së presidentit.
Deda, në një intervistë për tesheshi. com flet edhe për çështje tjera, si Demarkacionin, mundësinë e shkuarjes në zgjedhje të parakohshme dhe për “Alternativën” e tij…
Intervistoi: Blendi Gashi
Si e shihni këmbëngulësinë e Thaçit për themelimin e ushtrisë edhe përkundër kundërshtimeve të faktorit ndërkombëtar?
Kosovës i duhet ushtria, këtë çështje e kam ngritur edhe gjatë vizitës në Shtetet e Bashkuara para dy javësh. Nuk është pyetja a jemi për ushtri – se të gjithë jemi për. Por, 18 vjet pas bombardimeve të Serbisë nga NATO, Serbia është në Partneritet për Paqe, dhe ushtria e SHBA ka bashkëpunim të thellë me ushtrinë e Serbisë. A duam që Ushtria jonë të mos ketë bashkëpunim me ushtrinë e SHBA-së dhe NATO-n, sidomos kur e dijmë që FSK të gjitha ndihmat dhe trajnimet i merr nga SHBA.
Pa përkrahje të NATO-s e SHBA-ve, mbetet veç ushtri në letër apo? Dhe a rrezikohet mbështetja e tyre për FSK-në?
Udhëheqësia aktuale për synime të paqarta po na e rrezikon partneritetin me aleancën Euro-Atlantike. Ne duhet t’a krijojmë ushtrinë sa më shpejtë në partneritet dhe me mbështjetje të SHBA dhe duke e forcuar e jo dobësuar sigurinë e shtetit dhe të qytetarëve tanë.
Iniciativa e Thaçit a rrezikon koalicionin qeverisës duke parë se LDK është shprehur kundër themelimit të njëanshëm të ushtrisë?
Nuk kam pa qëndrim të tillë të LDK-së.
Ju si deputet i pavarur si do votoni për ligjin për ushtrinë?
Nuk do t’a gjeni asnjë deputet në Kuvend që do të votojë kundër ushtrisë. Më duket se do të merr kohë deri sa të procedohet në Kuvend ligji i ri për FSK-në nga ana e qeverisë.
Të kalojmë në një temë tjetër aktuale: a rrezikon Demarkacioni të rikthejë krizën institucionale? Sipas jush a duhet të ratifikohet apo jo?
Besoj thellë që urgjentisht na duhet marrëveshje politike e partive në pushtet dhe opozitë për përmbylljen e Demarkacionit ku edhe do të kishte edhe korigjim të gabimit të bërë nga qeveria me vijën e keqe kufitare edhe do të kishim liberalizim të vizave. Nuk kemi shumë kohë për këtë marrëveshje dhe druaj se mund të humbim shumë nëse mbetemi të bllokuar në istikamet politike, siç kemi mbetur qe 20 muaj.
Të flasim pak për partinë tuaj “Alternativën”: Sa jeni shtrirë deri më tani? Kur do zgjedhet orgnanet drejtuese të partisë dhe a do iu bashkangjitet ndonjë emër i njohur i skenës politike?
Do të regjistrohemi si iniciativë e jo parti. Deri tash jemi shtrirë në Mitrovicë, Prizren, Pejë, Gjilan, Gjakovë, Istog, ndërsa jemi duke e përmbyllur themelimin në Prishtinë, Podujevë, Ferizaj, Vushtrri. Sapo të pērfundojë themelimi i Alternativës në komuna, do të zgjidhet edhe udhëheqësia e përkohshme.
A pritni që vendi të shkojë në zgjedhje të parakohshme paralamentare? Sa është e gatshme “Alternativa”, dhe me kënd jeni të hapur të bëni koalicioni qoftë para ose paszgjedhore? A keni vija të kuqe për ndonjë parti?
Zgjedhjet parlamentare do të mbahen në atë moment që qeveria e humbë shumicën në Kuvend. Ne po përgatitemi për zgjedhjet e rregullta lokale që do të mbahen në vjeshtë të këtij viti. Modalitetet e pjesëmarrjes tonë në zgjedhje do ta marrim në kohën e duhur. Ndërsa kjo çështja e vijave të kuqe më së paku mund të na bëhet neve që jemi në politikë dhe që e kemi dëshmuar kënd nuk mund t’a kemi partner politik. Në Kosovë na duhen partneritete politike të natyrshme që edhe elektorati t’a dijë që pas zgjedhjeve nuk do të ketë ndrrim të pozicionit politik të subjektit politik që e votojnë.
Për fund, a do kandidoni për kryetar të Prishtinës, apo subjekti juaj do mbështet ndonjë kandidat të ndonjë partie?
Nuk kam menduar për kandidaturën në Prishtinë, ndërsa kënd do t’a propozojmë për kandidat për kryetar të kryeqytetit i mbetet të vendoset më vonë. /tesheshi.com/
