Pas ditë të tëra luftimesh të ashpra, qyteti i lashtë i Palmirës është vënë nën kontrollin e forcave qeveritare siriane. Edhe pse në pjesën lindore të qytetit mund të dëgjohen ende të shtëna armësh, siç njofton Observatori Sirian për të Drejtat e Njeriut, pjesa dërrmuese e militantëve të ISIS-it janë tërhequr.
Çlirimi i Palmirës shihet si një fitore e madhe ndaj ISIS-it. E njohur ndryshe si “Nusja e shkretëtirës,” stabiliteti dhe siguria janë kthyer në Palmira dhe me ndihmën e forcave ajrore ruse. Kështu pohon Komanda e Përgjithshme e Ushtrisë Siriane në një deklaratë në televizionin shtetëror sirian.
Një zëdhënës i Observatorit Sirian e përshkruan tërheqjen e ISIS-t nga Palmira si humbjen më të rëndë që prej qershorit të 2014-ës, kur grupi militant shpalli kalifatin.
Burimet nga terreni flasin për tre lagje në qytet të mbajtura ende nga ISIS-i, ndërsa shumica e militantëve janë tërhequr gjatë natës së kaluar, por raportimet e medias shtetërore deklarojnë një rimarrje të plotë të kontrollit të Palmiras.
Kjo fitore e forcave të Esadit hap mundësinë për një përparim të tyre në lindje dhe në jug të vendit. /tesheshi.com/
