Dabiku dhe Sorani, dy fshatra në veri të Sirisë, janë vënë nën kontrollin e Ushtrisë së Lirisë Siriane.
Operacioni për t’i marrë ato prej ISIS-it është kryer me ndihmën e forcave turke, në kuadër të oepracionit “Mburoja e Eufratit”.
Posaçërisht Dabiku, rreth 40 kilometra në verilindje të Halepit, mbart një rëndësi të veçantë për ISIS-in. Një komandant i forcave kryngritëse ka deklaruar se luftëtarët e ISIS-t kanë bërë pak rezistencë, duke u tërhequr në drejtim të el-Babit, më në jug të Sirisë.
Sipas agjencisë së lajmeve Anadolu Agency, avionët luftarakë turq dhe të koalicionit ndërkombëtar kanë kryer sulme ajrore mbi Dabik.
Presidenti turk, Rexhep Tajjip Erdogan, tha të shtunën se një pjesë e refugjatëve sirianë në Turqi mund të kthehen në vendin e tyre me t’u pastruar territoret nga ISIS-i. /tesheshi.com/
