Presidenti Thaçi ka dalë në mbrojtje të Haradinajt, pasi qeveria e Kosovës vendosi kthimin e FSK-së në Ushtri të Kosovës, një cështje për të cilën Uashingtoni reagoi duke shprehur padakortësi si akt politik.
“Për shkak të interesave të ngushta, ndonjëherë elektorale dhe ndonjëherë tjetër ideologjike, lidershipi në Kosovë e ka vonuar transformimin e Forcës së Sigurisë në Forca të Armatosura të Kosovës.
Unë vazhdimisht kam qenë konsistent në këtë pikë. Kosova duhet ta ketë ushtrinë e saj. Me iniciativën time si president, kemi ndërmarrë një fushatë vetëdijesimi, brenda dhe jashtë Kosovës, për të sensibilizuar miqtë tanë për rëndësinë e këtij procesi.
Aleatët tanë e dinë që ky proces duhet të përmbyllet pa vonesa. Po ashtu, e kemi bërë të qartë që askush, asnjë faktor i jashtëm, nuk mund të ketë veto në shtetndërtimin tonë.
Dua t’ua largoj çdo dilemë: jam pro transformimit të Forcës së Sigurisë në Forca të Armatosura të Kosovës. Ushtria e Kosovës nuk është kërcënim për rajonin. Përkundrazi, do të jetë në shërbim të ruajtjes së paqes, sigurisë shtetërore, rajonale dhe globale. Prandaj, në këtë pikë, institucionet e Kosovës flasin me një zë dhe kemi një qëndrim.
Ligji i miratuar nga Qeveria e Republikës së Kosovës duhet të procedohet edhe në Kuvend dhe periudha deri në miratimin e tij duhet të shfrytëzohet nga të gjithë ne për t’i bindur skeptikët e mbetur të këtij procesi. Jam i bindur se në koordinim të plotë me SHBA-në dhe aleatët tanë në NATO do ta përmbyllim këtë proces të vonuar, por jetik për Kosovën”, ka shkruar Thaçi në Fb.
Orët në vijim, pritet të shihet se ç’reagim do ketë dhe ndaj këtij qëndrimi të presidentit të Kosovës, lidhur me formimin e Ushtrisë, një nga pikat më të nxehta në politikën kosovare në raport më ndërkombëtarët.
Ky zhvillim vjen ndërsa politika dhe opinioni kosovar, po dominohen nga debati delikat mbi kufijtë. /tesheshi.com/
