Për nder të datëlindjes së 241-të të ushtrisë amerikane dhe për nder të Ditës Botërore të gjakut, me organizim te KFOR-it amerikan, është mbajtur aksioni për dhurimin gjaku me moton: “To give blood and save a life…BE ONE OF THE 300″ – Për të dhënë gjak dhe shpëtuar jetë…BËHU NJË PREJ 300”.
Majori i ushtrisë amerikane, Andrew J.Wieher, tha se ideja ka qenë që kampi Bondsteel, për nder të datëlindjes së ushtrisë amerikane të grumbullojë 300 doza gjaku, duke thyer kështu rekordin e dozave te grumbulluara të gjakut ndonjëherë në ndonjë bazë amerikane. Ai kujtoi faktin se në bazën ushtarake të North Carolina në maj të këtij viti u mblodh numri rekord prej 192 dozash.
Ai u shpreh jashtëzakonisht i lumtur që ushtarët amerikanë tejkaluan numrin e paraparë prej 300, duke arritur të grumbullojnë brenda një dite 462 doza gjaku. Si komandant i njësitit të shëndetësisë në Bondsteel, majori u shpreh se e gëzon fakti që ushtarët amerikanë po ndihmojnë Qendrën e Transfuzionit të gjakut në Kosovë në zbutjen e nevojave për produkte të gjakut për pacientët në nevojë.
Aksionit për dhurimin e gjakut ne kampin Bondsteel, i janë përgjigjur edhe Ministri i Shëndetësisë së Kosovës, Imet Rrahmani dhe drejtori i Qendrës për Transfuzion të gjakut, Hysen Sadriu duke kontribuar kështu edhe ata me dhurim gjaku.
Albana Gashi, menaxhere për marketing në QKTGJ në anën tjetër, jashtëzakonisht e kënaqur me numrin e ushtarëve që i janë përgjigjur ftesës, thotë se ky është numri rekord i dozave të gjakut të grumbulluara ndonjëherë nga kjo qendër.
Ajo përkujton se motoja e Ditës ndërkombëtare të dhurimit të gjakut për këtë vit është “Give blood, share life-Jep gjak shpërndaj jetë me të tjerët”, duke apeluar tek të gjithë njerëzit që gëzojnë shëndet të mirë t’i përgjigjen ftesës së kësaj qendre për dhurim të gjakut. /tesheshi.com/
