Pamjet filmike të bëra publike nga një organizatë izraelite e të drejtave të njeriut, B’Tselem, tregojnë se si një ushtar izraelit qëllon në sy të dhjetëra të pranishmëve një palestinez të shtrirë përtokë të plagosur. Ushtarë, forca sigurie e civilë gjenden në vendngjarje, por asnjë nuk reagon ndaj aktit.
Ngjarja ka ndodhur në një rrugë të Hebronit, në Bregun Perëndimor, ku dy palestinezë pretendohet të kenë sulmuar me thika një ushtar izraelit. Ky i fundit është plagosur në shpatull, kurse dy palestinezët janë qëlluar me armë, e njëri prej tyre ka ndërruar jetë.
Në pamjet filmike tregohet palestinezi i plagosur, të cilit nuk i jepet as ndihma mjekësore. Qartas duket më pas ushtari që e godet në kokë 21-vjeçarin palestinez, me gjakun që shpërthen në rrugë.
Një zëdhënës i ushtrisë izraelite ka bërë të ditur në vijim se ushtari që qëlloi mbi palestinezin është ndaluar nga policia ushtarake.
Issa Amro, një banor i Hebronit, e drejtues i një grupi aktivist, deklaron se kjo vrasje është një krim lufte, e një ekzekutim jashtëgjyqësor.
“Nuk u habita kur i pashë pamjet filmike. Nuk është hera e parë. Eshtë thjesht hera e parë që u kap qartë në video. Ne e dimë se kjo ngjet shpesh,” thotë ai.
Amnesty International i bëri thirrje Izraelit në tetor të vitit të shkuar t’i japë fund “modelit të vrasjeve të paligjshme”. Kjo organizatë e akuzoi Izraelin për “vrasje jashtëgjyqësore” të palestinezëve. /tesheshi.com/
