Gazeta izraelite Haaretz raporton dëshmi nga oficerë dhe ushtarë izraelitë të cilët konfirmuan se morën udhëzime të drejtpërdrejta për të qëlluar mbi palestinezët që mbërrinin në qendrat e ndihmës së Fondacionit Humanitar të Gazës (GHF), i cili mbështetet nga SHBA-të dhe Izraeli.
Oficerët dhe ushtarët izraelitë i thanë Haaretz-it se urdhrat për të qëlluar u dhanë nga komandantët e ushtrisë për t’i mbajtur palestinezët larg qendrave të ndihmës. Ata shtuan se palestinezët ishin të paarmatosur dhe nuk përbënin kërcënim për askënd, por megjithatë u urdhërua të qëllonin mbi ta.
Një ushtar izraelit i përshkroi qendrat e ndihmës në Rripin e Gazës si një “fushë beteje”, duke thënë: “Ne po qëllojmë mbi kërkuesit e ndihmës sikur të ishin një forcë sulmi”.
Duke folur për Haaretz, ai theksoi se ushtria izraelite nuk po përdor mjete konvencionale për të shpërndarë kërkuesit e ndihmës në Gaza, por të gjitha llojet e armëve të rënda, tha ai.
Një ushtar tjetër dëshmoi se “vrasja e civilëve që kërkojnë ndihmë në Gaza është bërë rutinë për ushtrinë izraelite”, me komandantët që nuk kanë nevojë të justifikojnë nevojën për të qëlluar mbi palestinezët.
Një tjetër e përshkroi shënjestrimin e civilëve pranë vendeve të shpërndarjes së ndihmave të kompanive amerikane, të cilat mbrohen nga ushtria izraelite, si “ideologjinë e komandantëve në terren”.
Sipas Ministrisë së Shëndetësisë së Gazës, 549 palestinezë janë vrarë dhe më shumë se 4,000 janë plagosur që nga 27 maji, pranë qendrave të ndihmës dhe në zonat ku banorët po prisnin kamionë ushqimorë.
Një rrjet organizatash joqeveritare palestineze paralajmëroi të enjten se Izraeli po kërkon të ruajë kaosin dhe dhunën në Rripin e Gazës duke kontrolluar shpërndarjen e ndihmës së pakët mes gjenocidit të vazhdueshëm.
Më 27 maj, Tel Avivi dhe Uashingtoni filluan zbatimin e një plani për të shpërndarë ndihmë të kufizuar përmes të ashtuquajturit “Fondi Humanitar i Gazës” jashtë mbikëqyrjes së Kombeve të Bashkuara dhe organizatave ndërkombëtare, duke i detyruar palestinezët e uritur të zgjedhin midis vdekjes nga uria ose të qëllohen nga ushtria izraelite. /tesheshi.com/
