A keni vënë re që oreksi juaj ndryshon me kalimin e viteve? Ky është një fenomen normal dhe duhet të përshtateni me vitet dhe të hani atë që është mirë për ju. Ekspertët zbulojnë se çfarë hahet në secilën moshë të jetës.
Të njëzetat
Për shkak të rritjes së eshtrave, e cila vazhdon edhe në të njëzetat, rekomandohen produktet e qumështit, që do të thotë se njerëzit në atë moshë mund të kënaqen duke ngrënë djathë. Njëzetvjeçarët do duhej të shmangin koktejet, alkoolin në përgjithësi, sepse mund t’ua dëmtojnë shëndetin e lëkurës, të flokëve dhe thonjve. Kurrsesi në atë moshë mos iu nënshtroni dietave drastike, por krijoni shprehitë e ushqimit të shëndetshëm dhe të balancuar.
Të tridhjetat
Në këtë moshë njerëzit janë të prirë për të ndierë lodhje dhe mungesë të energjisë. Në vend të kafesë dhe stimuluesve të tjerë në dukje të mirë, hani fruta të thata. Më saktë, më e mira është kajsia e thatë e cila ngadalë krijon energji. Rekomandohen edhe mollët dhe drithërat integrale. Mirë është të merren edhe shtesa ushqimore, më së shumti vitaminat dhe mineralet. Për të mos u shëndoshur, ekspertët rekomandojnë shmangien e sheqerit dhe të yndyrave të pashëndetshme.
Të dyzetat dhe të pesëdhjetat
Në këtë moshë mund të shfaqet anemia, prandaj ekspertet rekomandojnë mish të kuq, por jo shumë të pjekur, të cilët do të fusin hekur në organizëm. Për balancën hormonale është mirë të hahet soja, ndërsa nëse dëshironi të ruani lëkurën tuaj të re, konsumoni sa më shumë fruta dhe perime. Ëmbëlsira kurrsesi nuk rekomandohen në atë moshë sepse kaloritë grumbullohen më shpejt dhe është shumë më vështirë të digjen.
Të gjashtëdhjetat e më shumë
Në këtë moshë vitet e kanë bërë të veten dhe imuniteti nuk është më aq i fortë. Për t’u mbrojtur forconi konsumimin e probiotikëve. Dehidrimi mund të parandalohet me konsumim të shtuar të ujit, veçanërisht rekomandohet çaji, por pa sheqer. Të ushqyerit pasurojeni me fruta dhe perime, ndërsa nëse nuk dëshironi probleme shëndetësore, gjithsesi ikni nga produktet e mishit si sallami, proshutat./tesheshi.com/
