Samor Kumar Ghosh ka ushqyer 2,000 zogj lokal, çdo mëngjes për pesë vitet e fundit. Zogjtë fillojnë të mblidhen herët çdo mëngjes para dyqanit të ëmbëlsirave të Samor në qytetin lokal të Pabna, rreth 200 km nga Daka.
Një mëngjes, pesë vjet më parë, Samor ushqeu disa prej tyre. Të nesërmen ai vuri re se më shumë zogj filluan të mblidhen në të njëjtën kohë. Ditë pas dite, numri i zogjve u rrit dhe tani arrin deri në 2,000.
“Ishte muaji shkurt i vitit 2012, një mëngjes i hershëm dimri. Po qëndroja para dyqanit tim … Vërejta disa zogj që bridhnin duke kërkuar ushqim. Pasi i ushqeva atë ditë, të nesërmen zogjtë erdhën në grup dhe ishin më shumë në numër”, thotë Samor.
Samor i ushqen ata çdo ditë me shumë dashuri. Dhe tani një numër i madh njerëzish nga qyteti dhe qytetet e afërta mblidhen përpara dyqanit të tij të ëmbëlsirave “Shyamol Mistanno Bhandar”, për të shikuar zogjtë e mbledhur.
“Zogjtë udhëtojnë 10 deri në 15 km çdo ditë për të shijuar mëngjesin e tyre me mua. Unë shpenzoj 45,000 taka (gati 600 dollarë) në muaj për t’i ushqyer ata. Për mua, është si një parajsë kur zogjtë më rrethojnë në fillim të ditës”, thotë Samor.
Në Bangladesh, një familje e klasës së mesme mund ta ketë të vështirë të shpenzojë 600 dollarë në muaj, por Samor shpenzon një shumë të madhe në ushqimin e shpendëve. Ai justifikon shpenzimet duke thënë: “Në të vërtetë nuk po bëj asgjë. Është i Plotfuqishmi, dhe nëse dëshiron Ai (I Plotfuqishmi), do të kem mundësi të bëj më shumë për krijesat e Tij “.
Përkushtimi i Samorit e ka bërë atë të njihet një të apasionuar pas natyrës edhe në nivel kombëtar. Vitin e kaluar Departamenti i Pyjeve i Bangladeshit e shpërbleu atë me çmimin kryesor në nivel vendi, në kategorinë e “përkujdesjes së shpendëve”.
Samor, baba i katër fëmijëve, ka përfshirë edhe anëtarët e familjes në projekt. Djali i tij 11-vjeçar, Sharon Kumar Ghosh ndonjëherë ushqen zogjtë kur Samor është jashtë qytetit për biznes. Samor ka kërkuar që djali të vazhdojë traditën e ushqyerjes së zogjve në të ardhmen./tesheshi.com/
