Beogradi nuk e donte Joe Biden në krye të SHBA-së, i njohur për qëndrimet e tij anti-Millosheviç, ithtar i bmbardimeve të NATO-s mbi Serbi, apo i përkthyer ndryshe dhe si i afërt me faktorin shqiptar.
Vuçiç, i ndjerë mirë me Trump-in, firmosës me të i një marrëveshjeje ekonomike me Kosovën, duke mos pranuar gjithsesi që ta njohë atë, ka rezervuar në përshëndetjen e tij korteziale për Biden, ndryshe nga udhëheqës të të tjerë të rajonit, edhe një ftesë që ai të vizitojë Serbinë.
Madje Vuçiç ka qenë më i gjatë në mesazhin e tij se ç’duhet të jetë zakonisht nëtë tilla raste, duke e patur fund e krye me fjalë mikluese.
“Ky vit shënon 140-vjetorin e vendosjes së marrëdhënieve diplomatike midis Serbisë dhe Shteteve të Bashkuara.
Në periudhën e mëparshme, ne shënuam përvjetorë të rëndësishëm nga historia jonë e përbashkët, duke kujtuar shembujt e ndritshëm të aleancës tonë në anën e së vërtetës dhe drejtësisë.
Ata ishin një nxitje e fortë për ne, në Serbi, që të përpiqemi t’i kthejmë marrëdhëniet me Shtetet e Bashkuara në nivelin e një partneriteti të vërtetë, siç ishin dhe siç duhej të ishin, megjithë plagët e lëna nga kohërat e keqkuptimit dhe mosmarrëveshjes.
Unë jam i bindur se, me respekt të ndërsjellë dhe vlera të përbashkëta, ne do të kemi një partner në ju për forcimin e dialogut politik dhe bashkëpunimin ekonomik,” shkroi Vuçiç. /tesheshi.com/
