Kreu i katolikëve të Kosovës, Dodë Gjergji, ka përcjellë një lloj urimi që për muslimanët kosovarë ka patur dozë cinizmi në nëntekst, pasi i ka mëshuar mitit të ikjes prej “fesë të të parëve”, pra Krishtërimit.
“Dëshiroj të shpreh urimin tonë për të gjithë ata që agjërojnë dhe u uroj vëllezërve tanë që janë konvertuar në islam gjatë kohës, të kenë një agjërim të lehtë”, kanë qenë fjalët e Dodë Gjergjit.
Dhe një ndër përgjigjet ndaj këtij “urimi”, në aspekt fetar, ka qenë ajo e Adnan Simnicës, një fepërçuesi musliman në Kosovë, duke tentuar të shpjegojë një anë tjetër të këtij konvertimi që nuk ka asnjë lloj ikje prej fesë të të parëve, përkundrazi.
“I nderuari z. Dodë Gjergji,
Mbrëmë, me rastin e ritualit të Meshës së Pashkëve, për të cilën ne kemi respekt dhe, gjithashtu, për bashkëkombasit tanë të krishterë, por, meqë cituat Islamin, ne dhe konvertimin në myslimanë (fjalimin tuaj edhe e përcolla direkt në RTK), ju drejtohem me disa fjalë mirëkuptimi:
Shqiptarët gjithmonë, e veçanërisht në festa shkëmbejnë vetëm urime paqeje e tolerance, e jo mesazhe urimi me tendenca të caktuara.
Sa për informimin tuaj, të parët tanë fillimisht ishin myslimanë, meqë njerëzimi filloi me njeriun dhe pejgamberin e parë, Ademin a.s., e mandej shumë njerëz devijuan nga e vërteta. Pastaj një pjesë e tyre kaloi në idhujtari, krishterizëm etj, e mandej populli ynë me shumicë dërrmuese u rikthye në natyrshmërinë e vet të parë, në Islam, në fenë e origjinës njerëzore.
Kjo është e vërteta që konfirmon Allahu, i Cili është Zot i botëve, e nuk ka zot tjetër përveç Tij.
Me mirëkuptim e dashamirësi duhet t’i kalojmë festat, me paqe e tolerancë t’i urojmë ato, jemi vëllezër të një kombi, ndonëse besimet i kemi të ndryshme.
Ju lutem, pranoni sygjerimet e mirëfillta, e ju këshilloj që mos t’i shfrytëzoni festat për deklarime të paqëndrueshme!
Faleminderit për mirëkuptim!”, shkruan Simnica. /tesheshi.com/
