Vetëm pak orë para hyrjes në fuqi, urdhri i ri ekzekutiv i presidentit amerikan për emigracionin dhe refugjatët është bllokuar nga një gjykatës federal në Havai.
Derrick Watson, raporton BBC-ja, ka cituar “prova të diskutueshme” në argumentimin e qeverisë se ndalimi i ri i udhëtimit ishte çështje e sigurisë kombëtare.
Shteti i Havait ka argumentuar se ndalimi ka për ta dëmtuar turizmin dhe aftësinë për të thithur studentë dhe punëtorë të huaj.
Në vendimin 43-faqësh thuhet se një vëzhgim objektiv do të çonte në përfundimin se urdhri i ri ekzekutiv ishte nxjerrë me qëllimin për ta disfavorizuar një religjion të posaçëm.
Ky urdhër vendos një ndalim 120-ditësh për refugjatët, si dhe një ndalim për 90 ditë për hyrjen e qytetarëve nga gjashtë vende muslimane në SHBA. Ndërsa kritikët e shohin si diskriminues, Trump këmbëngul se urdhri synon të ndalojë hyrjen e terroristëve në vendin e tij.
Urdhri më i hershëm, pasi krijoi pështjellim e protesta, përfundoi po ashtu në gjykatë. /tesheshi.com/
