I bllokuar nga një gjykatë federale pas rrëmujës që shkaktoi, urdhri ekzekutiv i Trump-it për ndalimin e hyrjes në SHBA të refugjatëve dhe qytetarëve nga një numër vendesh muslimane është pasuar nga një tjetër, që ka disa ndryshime.
I pamundur për ta vazhduar betejën ligjore për urdhrin e parë ekzekutiv, Donald Trump zgjodhi në mënyrë të paralajmëruar zëvendësimin e tij me një tjetër, disi më të butë.
Urdhri i ri ekzekutiv, në dallim nga ai i mëhershmi, i lejon të hyjnë në SHBA refugjatët që tashmë e kanë marrë miratimin nga Departamenti i Shtetit. Në urdhrin e ri është hequr gjithashtu një ndalim i pakufizuar për të gjithë refugjatët sirianë.
Po ashtu, nuk do të jenë më shtatë shtete me shumicë muslimane qytetarët e të cilëve nuk do të lejohen të hyjnë në SHBA për 90 ditë, por gjashtë të tillë.
Siç pohon BBC-ja, masa ndaluese do të jetë për qytetarët e Iranit, Libisë, Sirisë, Somalisë, Sudanit dhe Jemenit. Siç qe sugjeruar më herët, Iraku është hequr nga lista, ngase, sipas zyrtarëve të Shtëpisë së Bardhë, ka shtuar kontrollin dhe verifikimin e vizave, si dhe ka pranuar të shkëmbejë më shumë të dhëna.
Dy ndër masat më të debatuara të urdhrit të mëhershëm, pezullimi i Green Card-ave dhe i vizave tashmë të dhëna, si dhe parapëlqimi i treguar për refugjatët kristianë, nuk do të jenë më.
Urdhri i ri parashikon që personat me Green Card nga këto vende të mos kenë pasoja prej tij.
Pakicat fetare nuk do të kenë përparësi, siç nënvizohej në urdhrin pararendës.
Urdhri i ri hyn në fuqi më 16 mars, dhjetë ditë pas nënshkrimit të tij, për të shmangur pështjellimin që krijoi ai i mëparshmi në janar. /tesheshi.com/
