Policia e Shtetit ka vënë në zbatim urdhrin e kryeministrit Edi Rama dhe ministrit të Brendshëm, Fatmir Xhafaj, duke nisur punën për analizat në qarqe sa i përket zbatimit të ligjit nga ana e vetë policëve, në kontrollet mbi territorin që ata kanë përgjegjësi në zonat e caktuara.
Në një deklaratë për mediat, Drejtori për Rendin Albert Dervishaj foli për rezultatet e analizës së parë që u realizua pas raportimeve për një ndërtim pa leje në grykën e Këlcyrës.
Ndërtimi ishte evidentuar nga inspektori dhe nuk ishte raportuar, çka solli shkarkimin dhe vënien para përgjegjësisë ligjore të dy shefave të komisariateve të Përmetit dhe Këlcyrës, vetë specialistit dhe vërejtje për drejtorin dhe zv.drejton e Policisë së Gjirokastrës.
Deklarata e plotë
U njohët sot paradite përmes një njoftimi për shtyp me masat e marra në fund të një analize të hollësishme, lidhur me mos veprimet e disa strukturave të Policisë së Shtetit, për një tentativë për ndërtim pa leje në grykën e Këlcyrës.
Veç përjashtimit të një punonjësi policie të rolit bazë, i cili është përgjegjës direkt për kontrollin e territorit, janë shkarkuar nga detyra edhe eprorët e tij, drejtues të policisë lokale.
Masat përfshijnë edhe 2 drejtuesit vendore të Policisë së Gjirokastrës, pasi mbi bazën e konkluzioneve të Drejtorisë së Standardeve nuk kanë ushtruar përgjegjësinë ndaj strukturave në varësi për raportimet për kontrollin e territorit.
Theksojmë këtu se kontrolli i territorit, në të cilin përfshihet edhe ruajtja e mjedisit nga çdo lloj krimi mjedisor, është detyrë dhe përgjegjësi e strukturave të Policisë Vendore.
E masat e ashpra justifikojnë përmasën e problematikës së shfaqur me ndërtimin në zonën e Këlcyrës.
Por ky nuk është rasti i parë, e pa dyshim nuk do të jetë as i fundit, i ndëshkimit të strukturave policore dhe çdo strukture tjetër të implikuar, nëse nuk reagojnë apo heshtin përballë paligjshmërisë, kudo qoftë ajo.
Në javët e kaluara janë marrë masa edhe për 2 drejtues të Komisariateve të Policisë në kryeqytet. Ndërtimi pa leje është dhe konsiderohet një krim mjedisor dhe Policia e Shtetit do të vijojë të jetë në krye të kësaj lufte.
Në zbatim të porosive të Kryeministrit dhe Ministrit të Brendshëm, në të gjitha drejtoritë vendore të policisë, do të nisin analiza të detajuara mbi problematikat e shfaqura dhe marrjen e masave për reflektimin ndaj tyre.
Duke përfituar nga ky komunikim publik, gjej rastin të apeloj në emër të Policisë së Shtetit dhe të kërkoj nga të gjithë institucionet, organizata joqeveritare, shoqëri civile dhe mediat padyshim, të angazhohen dhe të jenë në krah nesh, duke i garantuar se Policia e Shtetit do të vazhdojë me përkushtim dhe profesionalizëm, të përmbushë me përgjegjësi detyrat në zbatim të ligjit e shërbim të qytetarëve. /tesheshi.com/
