Departamenti i Administratës Publike ka sqaruar sot çështjen e pjesëmarrjes së punonjësve në fushatën elektorale pas disa urdhërave të ministrave teknikë që ndalonin çdo përfshirje të tyre në fushatë.
Albana Koçiu, drejtoresha e DAP tha se kushdo mund të marrë pjesë në fushatë jashtë orarit zyrtar të punës dhe larg perimetrit të institucionit.
“Të drejtat politike për punonjësit e administratës publike fillojnë pas orarit zyrtar dhe jashtë perimetrit të institucionit ku punojnë. Kushdo ka të drejtë të angazhohet politikisht me cilëndo parti. Mësuesit janë të lirë, drejtorët janë të lirë, por jashtë institucionit dhe jashtë orarit zyrtar”, deklaroi Koçiu.
Qeveria po përgatit një vendim ku parashikohet ngritja e një strukture të posaçme që do të monitorojë pjesëmarrjen e administratës në fushatë.
Sipas Koçiut, “DAP bashkë me strukturat e monitorimit do të ketë në vëmendje çdo shkelje të rregullave dhe çdo presion që do t’u bëhet punonjësve të administratës për pjesëmarrje në aktivitete publike pa dëshirën e tyre”,
Pas ministres së re të Financave që dha urdhër që lejet vjetore të merren pas datës 25 qershor edhe ministri i Shëndetësisë urdhëroi sot pezullimin e lejeve vjetore për periudhën nga 1 qershori deri në 25 qershor 2017.
Arben Beqiri i propozuar nga PD-ja urdhëron që “Të gjithë nënpunësit që janë duke kryer lejen vjetore njoftohen për ndërprerjen e saj. Urdhri, planifikimi i lejeve për punonjësit e shëndetësisë do të bëhet pas datës 26 qershor”./tesheshi.com/
