Qindra familje shqiptare jetojnë në zonat e prekura nga uragani ‘Harvey’, në Shtetet e Bashkuara të Amerikës.
Ambasadorja e Kosovës në Washington, Vlora Çitaku, ka njoftuar se institucioni që ajo udhëheq është përkujdesur që të komunikojë me shqiptarët në Houston të Texasit.
Çitaku ka bërë të ditur se përveç dëmeve materiale, shqiptarët janë jashtë rrezikut për jetën.
“Me shqetësim po përcjellim pasojat e uraganit dhe vërshimeve në Huston. Në zonat e prekura dhe përreth tyre jetojnë qindra familje shqiptare. Kam komunikuar me disa prej tyre dhe jam njoftuar që përveç dëmeve materiale, të gjithë janë shëndoshë dhe jashtë rrezikut. Ambasada e Kosovës dhe Konsullata në Neë York janë në dispozicionin tuaj. Kontakti emergjent është[email protected]. Po ashtu, nga Departmenti i Shtetit jemi njoftuar se asnjë shtetas i huaj nuk ka pësuar vdekjen”, ka shkruar Çitaku.
Uragani ‘Harvey’ është stuhia më e madhe që ka goditur Amerikën në 12 vitet e fundit, duke shkaktuar së paku 9 viktima në njerëz dhe dëme të jashtëzakonshme materiale. /tesheshi.com/
