Guvernatori i Floridës, Rik Skot u ka bërë thirrje 20 milionë banorëve, që të jenë të gatshëm të evakuohen.
Gjithashtu ai u kërkoi qytetarëve që gjenden përgjatë bregut të Gjirit të Floridës, evakuim emergjent, pasi lëvizja e uraganit Irma u zhvendos shpejt drejt perëndimit.
“Nuk do t’i mbijetosh goditjes. Është koha për të ikur”, tha Skot në Li Kaunti, në jugperëndim të Floridës.
Ndërkohë, ambasadorja e Shqipërisë në SHBA, Floreta Luli-Faber, përmes rrjeteve sociale i ka drejtuar një mesazh të gjithë shtetasve shqiptarë që jetojnë në zonat që mund të preken nga uragani në shtetin e Floridës që të ndjekin dhe zbatojnë udhëzimet e autoriteteve lokale.
“Një Uragan tjetër po kërcënon SHBA-në! Këtë herë pjesa jugore e shtetit të Floridas është në qëndër të vëmëndjes. Autoritetet amerikane po i qëndrojnë shumë afër popullsisë së zonave që parashikohet të preken nga Uragani Irma, dhe një pjese të madhe të popullsisë i është kërkuar të evakuohet.
Gjatë këtyre ditëve jam munduar të qëndroj në lidhje për informacione me përfaqësuesit e organizatave shqiptare në shtetin e Floridës. Ka pak shqiptarë që duket se kanë lëvizur nga banesat e tyre, pjesa me e madhe besojnë që mund t’i bëjnë ballë situatës aty ku janë.
Ju bëj thirrje që të ndiqni udhëzimet e autoriteteve lokale dhe njoftimet e rifreskuara që dalin nga ora në orë me parashikimet e lëvizjes së Uraganit”, shkruan Faber në rrjetet sociale.
Në vijim ajo publikon numrat e telefonit dhe adresat ku çdo kush mund të shkruajë për të marrë informacione mbi situatën.
“Kontaktet e Ambasadës në Uashington 202.223.4942, [email protected] dhe numri i emergjencës 202.758.9526 janë në dispozicionin tuaj për çdo informacion të mundshëm.
Uroj që kjo situatë të kalojë me sa më pak probleme, për të gjithë popullsinë e prekur nga Uragani, veçanërisht për shqiptarët që kanë lënë jo pak në vëndin e tyre dhe kanë vendosur të jetojnë e punojnë në SHBA”, shprehet diplomatja shqiptare në Uashington.
Irma nga uragani i kategorisë 5, ka rënë në stuhinë e kategorisë 4, por që fuqia shkatërruese e tij vazhdon të jetë e madhe.
Efektet e Irmas u ndjenë në veri të Kubës dhe në Bahama të premten dhe pritet të mbërrijë në Majami të dielën, njoftoi Qendra Kombëtare Amerikane e Uraganeve. /tesheshi.com/
