Kur Hazel McCallion doli në pension si kryebashkiake e qytetit kanadez të Mississauga-a në vitin 2014, në moshën 93-vjeçare, me arsye do të pritej që ajo të kalonte pjesën tjetër të jetës duke pushuar në një shtëpi fshati me shoqërinë e të dashurve të saj. Por “Uragani Hazel”, siç quhet ndryshe politikania në fjalë, ka mbetur aktive në jetën publike, aq sa kohët e fundit, në moshën 101-vjeçare, ajo pranoi ofertën për t’u bërë drejtore e aeroportit të Torontos, duke nënshkruar një kontratë trevjeçare. Pak kohë më parë, për më tepër, ajo kishte rinovuar bashkëpunimin me Universitetin e Torontos, si konsulente speciale.
Politikania shekullore, e imët, e cila tashmë numëron katër dekada veprim, është e famshme për “njohjen e saj enciklopedike të politikës”, drejtpërdrejtësinë dhe grushtin e saj. “Ajo është e vetmja politikane në Ontario që më bën të dridhem”, siç ka thënë në mënyrë anonime një ish-koleg i saj. “Edhe sot, sa herë që ajo vë në dukje një çështje, nuk kalon kurrë pa u vënë re”, komenton profesori i Shkencave Politike Tom Urbaniak.
Hazel McCallion ka lindur në vitin 1921 në Quebec. Ajo ishte më e vogla në një familje me pesë fëmijë. Duke u rritur, ajo u bë një lojtare profesioniste hokej e mirëpaguar, njëherësh duke u punësuar në një firmë inxhinierike në Montreal. Kur kompania u zhvendos në Toronto, McCallion e ndoqi dhe atje, ku ajo u përfshi dhe në qeverisjen lokale. Ajo mori një sërë rolesh ekzekutive, ku në vitin 1978 kandidoi për herë të parë për kryetare bashkie të Mississauga-s, duke mposhtur një kundërshtar që kishte insinuuar gjatë fushatës se gjinia e saj ishte një dobësi politike.
“Ai kishte një aftësi të çuditshme për të ndjerë pulsin e botës përpara se bota ta ndjente atë”, kujton sot Urbaniak. Në fakt, sipas një profili të ri të The Guardian për politikanen, një praktikë e zakonshme e saj ishte të bënte pazar çdo javë në një supermarket, për të kuptuar më mirë shqetësimet e votuesve të saj, të cilat ajo i përfshiu më vonë në fjalimet e saj.
Ajo qëndroi kryetare bashkie për 36 vjet, deri në pensionimin e saj në 2014. Por ajo nuk i humbi kurrë instinktet e saj politike, duke mbështetur fituesit e dy zgjedhjeve të ardhshme provinciale të Ontario-s, përfshirë dhe Justin Trudeau, përpara se ai të bëhej kryeministër në 2015.
Megjithatë, rrugëtimi i saj i gjatë në politikë nuk ishte pa pika të errëta. Në vitin 1982 një gjykatë vendosi se ajo kishte marrë pjesë në mbledhjet e bordit që diskutonin çështje me interes personal. Ndërsa në vitin 2009 ajo u akuzua për mbështetjen e ndërtimit të një qendre konventash miliona dollarëshe dhe hotel luksoz që do të përfitonte djalin e saj, rast që nuk u konfirmua në gjykatë.
Cili ishte reagimi i profesor Urbaniak kur mësoi se ajo rinovoi kontratën me aeroportin? “Për aq kohë sa të mundet, ajo do të qëndrojë aktive. Është e njohur mosmarrëveshja që ka pasur me drejtorin e mëparshëm të aeroportit. Ai mendoi se e kishte në dorë, por e kishte gabim”. /tesheshi.com/
