Kryeministri turk Binali Jëlldërëm ka dhënë lajmin se njëra prej urave të varura të Stambollit, Boğaziçi Köprüsü, do të quhet tani e tutje “Ura e dëshmorëve të 15 korrikut”, për nder të civilëve të vrarë gjatë rezistencës kundër përpjekjes për grusht shteti.
Vendimi për riemërtimin e urës që lidh anën aziatike dhe evropiane të Stambollit u mor të mërkurën gjatë një takimi të kabinetit qeveritar.
Jëlldërëm gjithashtu njoftoi se dy monumente të tjera do të ngrihen në Stamboll e Ankara për të vrarët gjatë përpjekjes për grusht shteti.
Rezistenca e popullatës në urën e emërtuar rishtas rezultoi të ishte vendimtare për dështimin e puçit ushtarak. Dorëzimi i ushtarëve puçistë në atë urë dhe mbërritja e presidentit Erdogan në aeroportin Ataturk, e fjalimi i mëpasshëm në orët e para të së shtunës së 16 korrikut, patën rol kritik në shkurajimin e forcave puçiste.
Përpjekja për grusht shteti më 15 korrik la 290 persona të vdekur e mijëra të tjerë të plagosur. Disa persona u vranë mizorisht në urën e Bosforit gjatë rezistencës kundër forcave puçiste. /tesheshi.com/
