Nga Blendi Gashi
Kryeministri Ramush Haradinaj ka nisur të bëjë lojëra ndaj Fatmir Limajt dhe duke mbajtur hapur anën e presidentit Thaçi, “armik” ky vitet e fundit i kreut të NISMA-s, edhe pse dikur ishin miq të ngushtë.
Është fusha e arsimit, konkretisht universitetet publike të hapura vite më parë nga Thaçi sa mbante postin e kryeministrit në gjashtë qytete, si Prizrenin, Pejën, Gjilanin, Gjakovën, Mitrovicën e Ferizajn, që Ramushi ka vendosur t’ia kthejë shpinën NISMA-s.
Ministria e Arsimit që drejtohet nga Shyqiri Bytyqi i NISMA-s, javë më parë ka formuar një komision për vlerësimin e qëndrueshmërisë së këtyre universiteteve, ku ka paralajmëruar mbylljen e disa prej tyre dhe mundësinë e shndërrimit fakultete të profilizuara me nevojat e rajoneve ku ndodhen.
“Lidhur me komisionet për vlerësimin e qëndrueshmërisë së universiteteve publike, kemi formuar një komision, faktikisht komisioni është pothuajse në finalizim të punës. Ideja e këtij komisioni është që të bëjë një vlerësim të qëndrueshmërisë dhe të cilësisë së universiteteve publike. Në kuadër të vlerësimit, nëse vërejmë që cilësia nuk është në nivelin e duhur, dhe qëndrueshmëria vihet në pikëpyetje, atëherë këto universitete mund të shndërrohen në fakultete përkatëse, të dy universiteteve në Kosovë. Nuk bëhet fjalë për mbyllje të fakulteteve, por vetëm për shndërrim në kampuse të dy universiteteve në Kosovë. Mendojmë në ngritjen e cilësisë. Mendojmë se edhe kryeministri është i interesuar të na përkrahë në ngritjen e cilësisë së sistemit universitar”, delaroi javë më parë Bytyqi.
Ditë më pas, Haradinaj sikur i dha mbështetje kësaj ideje ku tha se do të veprohet me kujdes, kurse gjatë fushatës zgjedhore parti thënë se “Kosova s’ka nevojë për kaq shumë universitete publike”, duke dalë kundër Thaçit.
Por siç duket gjërat tashmë kanë ndryshuar dhe Haradinaj ka tjetër qëndrim për universitetet e Thaçit duke thënë se ato nuk do të mbyllen dhe se askush s’ka të drejtë të bëjë një gjë të tillë.
“Ka pasë shumë deklarime rreth këtyre universiteteve. Unë ju siguroj se të gjitha universitete publike në Kosovë të ardhmen e kanë të garantuar. Nuk është fare në pikëpyetje ekzistenca e tyre. Nuk ka asnjë ide të kësaj natyre në Qeveri. Dhe, nuk e kemi atë të drejtë”, ka deklaruar ai.
Kjo deklaratë e Haradinajt e prerë tregon qartë për “tradhëtinë” e parë ndaj NISMA-s.
Pse e ndryshoi Haradinaj qëndrimin?
Kryeministri, edhe pse nuk ka dhënë një shpjegim, kjo mund të ketë ndodhur pas takimeve që Haradinaj ka pasur në vazhdimësi me Thaçin, ku ky i fundit mund ta ketë prekur këtë temë dhe të ketë kërkuar që të mos ndodhë mbyllja e universiteteve që i ka hapur pasi do të goditej direkt ai dhe do ishte një ndër dështimet e tij më të mëdha për çka me vite do flitej në opinion.
Arsye tjetër është se PDK-ja mund ta ketë “kërcënuar” Ramushin edhe me prishje të koalicionit, pasi dihet se Thaçi edhe pse president ka një lloj “ndikimi” në partinë që e udhëhoqi për vite të tëra.
Dhe në vend të përplasjes me PDK-në e Thaçin, kryeminsitri Haradinaj ka zgjedhë rrugën më të lehtë pra daljen kundër NISMA-s.
Mbetet të shihet si do e pret këtë “tradhëti” të Ramushit zëvendësi i tij Limaj. Deri më tani nuk ka ende një qëndrim nga ministri Bytyqi i cili tashmë e ka të qartë se ideja e tij për mbylljen e universiteteve të hapura nga Thaçi nuk do të kalojë. /tesheshi.com/
