Kryeministri i Serbisë, Aleksandër Vuçiç e ka komentuar krijimin e unionit të bashkive shqiptare si një lojë fëmijësh dhe si një gjest që vjen në kuadër të fushatës elektorale të 2017-ës. Ky bashkim u krijua të hënën dhe përfshinë qytete si Tirana, Prishtina, Tetova, Ulqini dhe Presheva.
“Ajo që i quajnë komuna shqiptare, janë lojëra fëmijësh. Kjo është një histori për votuesit e tyre, flamuj, printime dhe lapsa”, tha Vuçiç, kur u pyet gjatë një konference, bashkë me udhëheqësin e Demokracisë së Re të Greqisë, Kyriakos Mitsotakis. Vuçiç vijoi komentin e tij duke thënë se: “Kur ju nuk keni asgjë për të ofruar për njerëzit, si rritje ekonomike dhe reforma serioze, atëherë ju tregoni përralla për fëmijë”.
Sipas kryeministrit serb, pavarësisht se çfarë unionesh krijojnë shqiptarët, Presheva mbetet e njëjta. “Çfarë ndryshoi dje dhe sot në Preshevë? A e kanë ndarë nga Serbia? Nuk do të thosha kështu. Pra, leri fëmijët të luajnë, në qoftë se kjo e bën më të lehtë për ta”, tha Vuçiç. Megjithatë, kryeministri tha se në një kuptim, kjo mund të jetë pjesërisht e rrezikshme sepse, siç shpjegoi ai, kjo gjë nuk mund kontribuojë për marrëdhënie më të mira në Ballkanin Perëndimor.
Thuajse të njëjta akuza ngriti kryeministri serb kundrejt homologut të tij shqiptar, edhe gjatë një konference të përbashkët në Serbi, që u mbajt rreth dy muaj më parë. Ai tha se Rama bën deklarata të mëdha për fushatën e tij zgjedhore./tesheshi.com,/
