Unioni i Gazetarëve ka publikuar një raport alarmant mbi të drejtat e gazetarëve në të gjithë vendin.
Sipas Aleksandër Çipës, kryetarit të UGSH-së, “vetëm në 4 muajt e fundit 62 gazetarë kanë humbur vendin e tyre të punës”, ndërkohë që një numër i konsiderueshëm reporterësh dhe punonjësve të mediave nuk kanë marre pagën e tyre.
Çipa paraqiti një dokument të detajuar për të gjithë qarqet e vendit, informacione që vinin nga degët e Unionit të Gazetarëve dhe tha se do të ketë periodikisht një raportim të plotë.
Duke reaguar mbi një politikë bojkoti që disa pronarë mediash ushtrojnë ndaj organizatës që mbron të drejtën e gazetarëve, Aleksandër Çipa tha se kjo nuk është gjë tjetër por “vetëm censurë” dhe i bëri thirrje gazetarëve që të mos vetëcensurojnë aktivitetet ku bëhet fjalë për mbrojtjen e të drejtave bazike të lirisë së shprehjes.
UGSH ndërkaq deklaroi se ka 13 procese ndaj gazetarëve, ku problem më i madh është ekspozimi dhe pamundësi për të mbrojtur veten nga agresioni i njerëzve të fuqishëm dhe të pasur.
Çipa i bëri thirrje BE-së dhe SHBA-së në Shqipëri që të jenë më të azhornuar në mbrojtjen e të drejtave të gazetarëve shqiptarë. /tesheshi.com/
