Një raport i UNICEF-it e përshkruan me nota të errëta situatën e fëmijëve sirianë në vitin 2016, duke cilësuar atë si më të keqen përgjatë konfliktit gjashtëvjeçar në vend.
Gjatë 2016-s ka patur një rritje të konsiderueshme të numrit të fëmijëve sirianë të vrarë, të gjymtuar apo të rekrutuar. Vetëm gjatë vitit të shkuar janë vrarë më së paku 652 fëmijë, një rritje me 20 për qind nga viti paraardhës. Një shifër që mund të jetë më e lartë nëse kihet parasysh se raporti flet vetëm për viktimat e konfirmuara zyrtarisht.
Geert Cappelaere, drejtori rajonal i UNICEF-it për Lindjen e Mesme dhe Afrikën e Veriut, i quajti të papara përmasat e vuajtjeve të fëmijëve sirianë.
Gjashtë milionë fëmijë e kanë mbështetur tani ekzistencën e tyre te ndihma humanitare, ndërsa 2.3 milionë kanë ikur nga vendi dhe tashmë gjenden në Turqi, Liban, Jordani, Egjipt dhe Irak. Rreth 300.000 fëmijë sirianë po jetojnë nën rrethim, e nuk mund të marrin ndihmë humanitare.
“Gjendja për fëmijët sirianë ka prekur fundin,” ka deklaruar Juliette Touma, zëdhënësja rajonale e UNICEF-it. “Viti i kaluar ka qenë më i keqi që prej fillimit të krizës…”
“Fëmijët janë shumë të vetëdijshëm për këtë situatë, e duan që lufta të mbarojë, kështu që të kthehen në shtëpi e të jenë përsëri fëmijë.” /tesheshi.com/
