Një raport i UNICEF-it, i bërë publik një ditë më parë, e paraqet dramatike gjendjen e fëmijëve në nivel global.
Raporti thotë se fëmijët përbëjnë sot thuajse gjysmën e të gjithë refugjatëve të botës, me numrin e refugjatëve fëmijë të dyfishuar në dekadën e fundit.
Mbi 50 milionë fëmijë ose kanë emigruar në një vend tjetër, ose janë shpërngulur brenda vendit. Në raport thuhet se 45 për qind e refugjatëve fëmijë vijnë nga dy vende, nga Siria dhe Afganistani.
Diku te 28 milionë fëmijë në tërë globin janë nxjerrë nga shtëpitë për shkak të konflikteve të dhunshme, e thuajse aq i kanë lënë shtëpitë në kërkim të një jete më të mirë.
Fëmijët refugjatë dhe emigrantë përballen me një numër rreziqesh, shpjegon raporti, duke filluar nga mbytja në det, kequshqyerja, dehidratimi, rrëmbimi, përdhunimi e vrasja.
UNICEF i paraqet fëmijët si më të pambrojturit në glob, e i paralajmëron qeveritë se numri i refugjatëve fëmijë është i prirur të rritet nëse nuk do të ketë reagim ndaj situatës.
Ted Chaiban, drejtori i programeve të UNICEF-it, shprehet kështu: “E rëndësishme është se këta në lëvizje janë fëmijë. Dhe ata duhet të trajtohen si fëmijë. Ata meritojnë të mbrohen.”
Ky raport flet për dhjetë milionë refugjatë fëmijë dhe për një milion azilkërkues fëmijë statusi i të cilëve ende nuk është i përcaktuar.
100.000 të vegjël të pashoqëruar kanë aplikuar për azil në vitin 2015 në 78 vende, një shifër tre herë më e lartë se e një viti më parë. Pasi u mungojnë shpesh dokumentet, ata janë fare të pambrojtur.
Raporti i bën thirrje bashkësisë ndërkombëtare t’u sigurojë mbrojtje, arsimim dhe shërbim shëndetësor këtyre fëmijë. Një thirrje vjen dhe për qeveritë, që duhet t’i analizojnë shkaqet rrënjësore që çojnë në lëvizjet e mëdha të refugjatëve dhe emigrantëve.
“Ndonëse shumë komunitete dhe njerëz anekënd botës i kanë mirëpritur fëmijët refugjatë dhe emigrantë, ksenofobia, diskriminimi dhe përjashtimi përbëjnë kërcënime serioze për jetën dhe të ardhmen e tyre,” ka thënë drejtori ekzekutiv i UNICEF-it, Anthony Lake.
“Por nëse refugjatët e vegjël priten dhe mbrohen sot, nëse ata kanë mundësinë të mësojnë, të rriten, e të zhvillojnë aftësitë e tyre, ata mund të jenë një burim stabiliteti dhe progresi ekonomik.” /tesheshi.com/
