Me mijëra refugjatë mund të mbeten pezull në rrugëtimin e tyre në Europë, pasi vende të ndryshme të BE-së po miratojnë rregulla të ndryshme për kufijtë e tyre, si mënyrë për të menaxhuar krizën e refugjatëve. Agjencia e OKB-së për refugjatët, UNHCR paralajmëroi se këto rregulla të ndryshme mund të ndikojnë në bllokimin e refugjatëve dhe lënien e tyre me status të papërcaktuar.
UNHCR bëri thirrje që të ngrihen qendra të mëdha pritjeje në vendet ku së pari mbërrijnë refugjatët. Ky propozim vjen ndërsa Gjermania vendosi përkohësisht kontrollet në kufirin e saj me Austrisë.
Fluksi i refugjatëve në fundjavës solli këtë lëvizje të Gjermanisë, ndërsa Europa nuk po gjen zgjidhje për përballimin e fluksit të njerëzve, kryesisht nga Siria, por edhe nga Afganistani, Eritrea dhe vende të tjera që i ikin dhunës e luftës.
Shumë refugjatë nuk pranojnë të regjistrohen në vende si Greqia apo Hungaria, duke u druajtur se kjo mund t’i ndalojë në synimin për të marrë azil në Gjermani apo vende të tjera të BE-së.
UNHCR thotë se është e shqetësuar pasi emigrantët që kërkojnë mbrojtje mund ta gjejnë veten në një qark të mbyllur.
Njoftimet e fundit për masa të ndryshme në kontrollin e kufijve, sipas agjencisë, vetëm sa nënvizojnë urgjencën e një përgjigjeje të përbashkët euorpiane.
Agjencia përcjell edhe idenë e ngritjes së qendrave efektive që së bashku do të mbështesin, regjistrojnë dhe skanojnë njerëzit që mbërrijnë në Greqi, Itali e Hungari. /tesheshi.com/
