Kampionët e Francës duket se do të kenë një trajner të ri në sezonin e ardhshëm. Laurent Blanc mund të jetë në fund të aventurës te skuadra e kryeqytetit francez, pasi në orët në vazhdim ai mund të zëvendësohet me spanjollin Unai Emery.
Drejtuesit e PSG-së kanë vënë gishtin te njeriu që i dha Seviljes për tre vite rresht trofeun e Ligës së Europës.
Synimi i tyre parësor ka qenë Diego Simeone, por të vetëdijshëm se është thuajse e pamundur ta sjellin atë, kanë vendosur të bëjnë një zgjedhje tjetër.
Edhe pse e ka fituar kampionatin francez në tre vitet e qëndrimit të tij te PSG-ja, Laurent Blanc nuk ia ka dalë të ketë sukses në Champions League. Eliminimi në çerekfinale nga Mançester Siti në sezonin që sapo u mbyll nuk është përtypur nga pronarët e klubit. I paaftë për të përmbushur objektivin madhor, fitimin e Champions League-s, Laurent Blanc do duhet të largohet prej postit të tij.
Unai Emery ka patur një sukses të jashtëzakonshëm në Ligën e Europës me Seviljen, por në kampionatin spanjoll nuk ka shkëlqyer, posaçërisht këtë vit. Sevilja është renditur në vend të shtatë në fund të sezonit në La Liga, me plot tetë pikë më pak se Selta Vigo e pozicionuar para saj. /tesheshi.com/
