Thuajse dy muaj pasi pamjet e pesëvjeçarit sirian Umran Daknesh të mbytur në pluhur e gjak bënë xhiron e botës, duke e shndërruar atë në simbol të vuajtjeve nga konflikti në vend, i vogli është plagosur sërish, e këtë herë rëndë.
Umran ka marrë plagë të rënda pas goditjeve nga bombardimet mbrëmjen e së dielës së 16 tetorit, dhe tani ndodhet në gjendje kritike për jetën.
Ai e pësoi nga sulmet ajrore të avionëve rusë mbi Katerxhi, një zonë nën kontrollin e kryengritësve në Halep.
Ky fëmijë u fotografua më 18 gusht me fytyrë të përvuajtur teksa qëndronte i ulur në një autoambulancë në pritje të ndihmës së parë pas nxjerrjes nga rrënojat. I lemeritur nga ç’i kishin parë sytë, Umran Dakneshi as nxirrte zë e as reagonte ndaj interesimit për të.
Siç vijon tragjedia për Umranin, ashtu vijon dhe për civilët e tjerë në Halep. Së paku 14 civilë u vranë këtë të hënë në qytetin verior të Sirisë, duke e çuar në 47 numrin e të vrarëve gjatë 24 orëve të fundit. /tesheshi.com/
