Shkelja e hapur e Marrëveshjes së Brukselit lidhur me Parkun e Paqes në Mitrovicë, një produkt hileqar serb për ta mbajtur të ndarë qytetin, ka detyruar numrin 2 të ambasadës amerikanë në Prishtinë, Jennifer Bachus, që të lëshojë ultimatumin për heqjen e tij brenda 48 orëve. Sipas firmave të hedhura me datë 25 gusht nën hyqmin e zyrtarëve të lartë europianë, mes krerëve të Prishtinës dhe Beogradit, ky park duhej hequr sot, më shkak nisjen e punimeve për rinovimin e urës. Por siç është parathënë, edhe në disa shkrime të portalit tesheshi.com, kjo gjë nuk ka ndodhur dhe vështirë të ndodh, pasi gjithçka diktohet nga Beogradi. 
Kështu, z/ambasadorja amerikane tha se pas 48 orësh duhet të fillojnë punët në rinovimin e urës, ashtu siç është paraparë në marrëveshje. Ajo i bëri këto komente pas një vizite që i bëri kryetarit të komunës së Mitrovicës, Agim Bahtiri.
“Unë e vlerësoj lidershipin dhe mirëkuptimin e kryetarit Bahtiri, por gjithashtu vlerësoj se implementimi i marrëveshjes për renovimin e Urës që do të bëhet pas 48 orësh”, garantoi znj. Bachus. Ndërsa Bahtiri tha se ka marrë garanci nga SHBA-ja, se nuk do të preken kufijtë administrativë komunalë, gjë për të cilën këmbëngulin serbët e Veriut.
Në anën tjetër, edhe Zyra e Bashkimit Evropian në Kosovë ka premtuar se heqja e Parkut të Paqes do ndodhë brenda 48 orëve, por ka shtuar se kjo shtyrje e shkurtër duhet të mundësojë përmbylljen e diskutimeve rreth Memorandumit të Mirëkuptimit mbi kufijtë komunalë në mes të komunave Mitrovica Veriore dhe Mitrovica Jugore.
Ndërsa komandanti i KFOR-it, Guglielmo Luigi Miglietta, ka vizituar rreth mesditës urën e Ibrit, por nuk ka pranuar të flas për media.
Në anën tjetër, një kompani ndërkombëtare që është përzgjedhur nga BE-ja për kryerjen e punimeve në urën e Ibrit, ka sjell një pjesën jugore të Mitrovicës, gjatë natës një pjesë të materialit i cili do të përdoret për bllokimin e urës gjatë kryerjes së punimeve.
Të shohim ç`do të ndodhë pas 48 orësh, pasi duket që Uashingtoni dhe Brukseli nuk po janë në të njëjtën linjë, jo sa i përket afatit, por kushtit serb për lirimin e urës. /tesheshi.com/
