Një ditë pasi opozita pranoi të ulej në tryezën e Reformës Zgjedhore, duke patur përballë dy individë që nuk i donte aty si kusht për t’u ulur – Gjiknurin dhe Hajdarin – kreu demokrat Basha ia faturoi Ramës atë që u konsiderua dorëzim i tij. “Teza që u legjetimua Damian Gjiknuri ka dalë drejtpërdrejtë nga Edi Rama”, tha Basha. Sipas tij, bashkëkryetari i reformës do gjykohet me patjetër.
“Nuk ka për të patur amnisti as për Damian Gjiknurin, as për Ymer Lalën. Dërgimi aty ku e kanë vendin është prioritet i PD. Këta janë të gjithë ushtarë të Edi Ramës. Stigmatizimi i procesit të reformës zgjedhore nuk është gjë tjetër vetëm rënie pre e kësaj propagande”, theksoi kreu demokrat.
Ai mbrojti dhe djegien e mandateve, duke e arsyetuar si vijon: “Kjo betejë nuk bëhet as për karriget tona, as për fatet tona politike. Mandatet i dogjëm për t’i treguar botës se këtu demokracia është në grahmat e fundit. Këto veprime kishin për qëllim vetëdijësimin e Perëndimit se Shqipëria ka nevojë për vëmendje dhe ndihmë për të ndaluar rënien në autokraci”. /tesheshi.com/
