Presidenti serb Vuçiç tha se bisedimet në Bruksel përfunduan pa sukses në drejtim të gjetjes së një rruge të qartë drejt normalizimit të marrëdhënieve me Kosovën.
“Serbia e pranoi propozimin e kompromisit të BE-së”, tha Vuçiç, duke shtuar se kryeministri i Kosovës, Albin Kurti nuk e dëshironte atë.
Në Bruksel u mbajt raundi i ri i dialogut në nivelin më të lartë politik, i pari pas shpërthimit të dhunës në veri të Kosovës në fund të majit, i cili acaroi edhe më tej marrëdhëniet ndërmjet Prishtinës dhe Beogradit.
“Duhet të vazhdojmë të bisedojmë”, tha presidenti i Serbisë.
Duke iu drejtuar gazetarëve, Vuçiç tha se propozimi i kompromisit ishte që fillimisht të diskutohet për Bashkimin e Komunave me shumicë serbe.
“Të shohim nëse ka një proces të besueshëm, nëse ka dhe po shkojmë drejt formimit të ZSO-së, paralelisht do të shkojmë drejt obligimeve tona, por pala tjetër nuk e ka pranuar”, tha presidenti i Serbisë.
Për rezultatin e takimit pritet të deklarohen përfaqësuesit evropianë dhe kryeministri i Kosovës. /tesheshi.com/
