Janë ulur çadrat e shoqërisë civile prej nga u mblodhën mijra firma në mbështetje të Reformës në Drejtësi. Ky proces i marrjes së një mbështetjeje nga qytetarë të ndryshëm, i bëri karshillëk çadrës së opozitës, aty ku prej afro dy javësh po zhvillohet një protest maratonike. Një përfaqsuese e grupimit civil mohoi që pas firmave të tyre të qëndronte politike, siç dhe janë anatemuar nga media pranë opozitës.
“Nisma e peticionit synon t’i japë zë qytetarëve dhe jo politikanëve. Në 5 ditë ne mblodhëm 31 mijë e 777 firma qytetarësh në mbështetje të kësaj reforme. Ky është një mesazh për klasën politike në Shqipëri se është koha që të zgjedhurit të respektojnë vullnetin e zgjedhësve për të pasur një drejtësi të ndershme dhe për të gjithë. Një politikë e përgjegjshme do ta kishte të pamundur ta anashkalonte një kërkesë me të tilla përmasa”.
Këto firma do t’i dorëzohen parlamentit, si një formë imponuese për të mbyllur sa më shpejt procesin e Reformës në Drejtësi. /tesheshi.com/
