Një polic është vrarë dhe mbi 100 persona janë plagosur jashtë parlamentit të Ukrainës, ndërsa deputetët kanë dhënë mbështetjen e parë për reformat që u japin më shumë autonomi krahinave lindore.
Garda Kombëtare e Ukrainës thotë se 4 pjesëtarë të saj kanë “lëndime të rënda për jetën” nga një shpërthim granate në protestën jashtë parlamentit.
Dhjetëra protestues, po ashtu, janë plagosur nga shpërthimi, për të cilin ligjvënësi, Anton Harashchenko, tha se ishte shkaktuar nga një “granatë luftarake”, e hedhur kundër rojeve të parlamentit.
Një korrespondent i rrjetit BBC ka përshkruar se janë dëgjuar tri granata dhe një shpërthim më i madh.
Protestat dhe përshkallëzimi I dhunës nisi pasi parlamenti i Ukrainës ka miratuar në lexim të parë legjislacionin presidencial për ndryshimet kushtetuese, me të cilat do të mundësohet më tepër autonomi për separatistët prorusë në pjesën lindore të këtij vendi.
Dhjetëra ligjvënës i kanë kundërshtuar këto ndryshime dhe për një farë kohe bllokuan edhe foltoren e parlamentit. /tesheshi.com/
