Ushtarët ukrainas dëshmuan se ushtarët rusë u rrëmbyen nga përmbytjet dhe u larguan nga bregu lindor i lumit Dnieper pas shembjes së digës Nova Kahovka, tha një oficer i forcave të armatosura ukrainase. Shumë ushtarë rusë u vranë ose u plagosën në kaos, tha ai, sipas CNN.
Kapiteni Andrej Pidlisny tha se kur diga u shemb të martën, më 6 qershor, në orët e para të mëngjesit, “askush nga pala ruse nuk arriti të shpëtonte”.
“Të gjitha regjimentet që kishin rusët në atë anë u fundosën,” tha ai.
Pidlisny tha për CNN se besonte se rusët e sulmuan digën qëllimisht për të prishur planet e forcave ukrainase për një kundraofensivë të pritshme.
“Armiku hodhi në erë hidrocentralin e Kahovkës rreth orës 03:00 të mëngjesit për të ngritur nivelin e ujit dhe për të përmbytur bregun e majtë të lumit Dnieper si dhe vendbanimet që ndodhen aty. Është e pamundur për ukrainasit dhe forcat e armatosura të përparojnë atje në të ardhmen”, tha ai.
Pidlisny shpjegoi se pjerrësia e tokës rreth lumit nënkuptonte që ushtria ruse – e vendosur në bregun lindor – pësoi goditje të rënda për shkak të thyerjes së digës. Njësia e tij ishte në gjendje të monitoronte zhvillimet duke përdorur drone dhe ushtarë në terren.
“Bregu i majtë (lindor) është më i ulët se i djathti, kështu që është më i përmbytur. Pozicionet e armikut në bregun e lumit u zhytën gjithashtu. Duhet të kuptoni se pozicionet e armikut nuk janë vetëm llogore, por edhe shtëpi të zakonshme civile ku ata jetuan”, tha Pidlisny.
Njësitë ruse në rrezik mund të mos jenë paralajmëruar, ndoshta për të ruajtur elementin e befasisë, shtoi kapiteni. /tesheshi.com/
