Australia ka dërguar në Ukrainë ngarkesën e parë të automjeteve të saj të blinduara Bushmaster, shkruan The Guardian.
Kjo është dërgesa e parë nga “paketa” prej 20 Bushmasters që Australia synon për Kievin dhe që kap vlerën e 50 milionë dollarëve.
Automjetet janë të ngjyrosura me ngjyrë jeshile, mbi to janë “pikturuar” flamuri ukrainas, si dhe mesazhi “bashkuar me Ukrainën” në gjuhën ukrainase dhe angleze.
Ministri australian i Mbrojtjes Peter Dutton dha disa detaje të tjera në lidhje me dhuratën e 20 automjeteve Bushmaster për Ukrainën në konferencën për shtyp të mëngjesit të sotëm në bazën Amberley RAAF.
“Nuk është një tank. Nuk mund të vendoset plotësisht në vijën e frontit, por mund të lëvizë njerëzit, veçanërisht pasi ne shohim raporte për forcat ruse që vendosin mina tokësore, etj.. Ky do të jetë një element shumë kyç në ruajtjen e sigurisë së ushtarëve”, shtoi Dutton.
Australia ka rreth 1000 Bushmaster në flotën e saj. /tesheshi.com/
