Sipas UNICEF-it, mbi 1.3 milionë njerëz në zonat e prekura nga lufta në Ukrainën lindore janë duke përjetuar një situatë dramatike për shkak të mungesës së ujit, si pasojë e infrastrukturës së shkatërruar nga konflikti.
Mungesa e ujit është e pranishme në rajonin e Luhanskut, ku një pjesë e mirë e banorëve furnizohen nga kamionët cisternë me ujë apo detyrohen për të udhëtuar drejt fshatrave përreth për ta siguruar atë. Vetëm në këtë rajon janë prekur nga mungesa e ujit më shumë se 470.000 njerëz, duke përfshirë 118.000 fëmijë. Përfaqësuesja e UNICEF-it për Ukrainën, Giovanna Barberis, u shpreh në një deklaratë se, “Uji është një nga nevojat më të atypëratyshme për fëmijët dhe të rriturit në Ukrainën lindore.”
Vetë kjo agjenci, së bashku me organizma të tjerë partnere, po u mundësojnë që nga janari furnizimin me ujë 550.000 banorëve në rajon.
Gjendja bëhet akoma më e vështirë ndërsa shirat janë të pakta dhe temperaturat njohin rritje. Një tjetër rrezik i pranishëm është bartja e sëmundjeve nëpërmjet ujit, pasi njerëzit nuk janë në gjendje ta transportojnë dhe ta ruajnë atë ashtu siç duhet.
Gjithnjë sipas shifrave të dhëna nga UNICEF-i, gati 1.4 milionë banorë janë zhvendosur brenda territorit të Ukrainës që kur konflikti mes separatistëve prorusë dhe forcave qeveritare ukrainase nisi në marsin e vitit të shkuar. Më tepër se 5 milionë njerëz kanë nevojë për ndihma humanitare, përfshirë 1.7 milionë fëmijë. /tesheshi.com/
