Parlamenti ukrainas (Verkhovna Rada) votoi të enjten për të miratuar një rezolutë për riemërtimin e më shumë se 300 vendbanimeve në Ukrainë.
Deputeti Oleksiy Honcharenko tha në Telegram se rezoluta, e cila u mbështet nga Verkhovna Rada me 281 vota, do të riemërtojë 328 vendbanime, transmeton Anadolia.
Deputeti tjetër, Jaroslav Železnjak, tha se rezoluta i referohet vendbanimeve që “përmbajnë narrativa ruse dhe sovjetike”.
Železnyak tha se ato përfshijnë emra të rusifikuar, si dhe emra kushtuar figurave kryesore ruse dhe simboleve sovjetike.
Në sqarimin e rezolutës së publikuar në faqen e Radës së Lartë, thuhet se rezoluta propozon riemërtimin e katër rretheve, dhjetë qyteteve, 56 vendbanimeve dhe 262 fshatrave në 22 rajone.
Në faqen e internetit thuhet se 14 përfaqësues të Radës së Lartë kundërshtuan rezolutën.
Që nga fillimi i luftës ruso-ukrainase në shkurt 2022, Kievi zyrtar ka intensifikuar përpjekjet për të hequr simbolet ruse dhe sovjetike në Ukrainë.
Procesi filloi pasi Ukraina fitoi pavarësinë në vitin 1991, por mori vrull pas Revolucionit Maidan të vitit 2014, ku protestat masive çuan në rrëzimin e presidentit të atëhershëm Viktor Janukoviç, i cili shihej si një politikan pro-rus. /tesheshi.com/
