Ukraina ka ulur tensionet për një sulm të mundshëm rus, duke thënë se nuk beson në “parashikimet apokaliptike”, pasi zyrtarët amerikanë theksuan se Moska kishte mbledhur 70 për qind të forcës ushtarake të nevojshme për një pushtim të plotë.
Zyrtarët amerikanë të paidentifikuar i thanë mediave amerikane se ishin të informuar se operacioni i kapjes së shpejtë të kryeqytetit ukrainas dhe përmbysjes së Presidentit të zgjedhur në mënyrë demokratike Volodymyr Zelensky ishte një nga mundësitë më agresive të ndërhyrjes së Rusisë mbi Ukrainën.
Në atë skenar, numri i viktimave civile nga 25,000 në 50,000 është i mundur, si dhe rreth 25,000 viktima në ushtrinë ukrainase, thanë zyrtarët amerikanë.
Por ministri i Jashtëm ukrainas Dmitro Kuleba e vuri në dyshim këtë informacion.
“Unë nuk besoj në parashikimet apokaliptike. Vende të ndryshme kanë skenarë të ndryshëm, por Ukraina është e gatshme për çdo zhvillim”, ka shkruar ai në Twitter në gjuhën ukrainase, gjë që tregon se mesazhi është i dedikuar për publikun vendas.
“Ukraina sot ka një ushtri të fortë, mbështetje të madhe ndërkombëtare dhe besimin e ukrainasve në vendin e tyre. Armiku duhet të ketë frikë nga ne, jo ne”, shtoi ai.
“Kryevepra e luftës propagandistike amerikane”
Shanset për të gjetur një zgjidhje diplomatike të krizës mbeten “dukshëm më të mëdha se kërcënimi i përshkallëzimit të mëtejshëm”, tha Mihailo Podoljak, një këshilltar i presidentit.
Qeveria e Kievit ka zbutur tensionet mbi kërcënimin e Rusisë javët e fundit në një përpjekje për të stabilizuar tregjet dhe për të parandaluar panikun në mesin e popullatës, megjithëse Shtetet e Bashkuara paralajmërojnë se një sulm mund të jetë i pashmangshëm dhe se forcat e NATO-s janë në gatishmëri.
Shtetet e Bashkuara dhe Britania janë akuzuar për ekzagjerim të rrezikut të një sulmi rus, gjë që ata e mohojnë.
Siç thuhet në mediat amerikane, Rusia gjithashtu mund të vërshojë Ukrainën me sabotazhe, sulme kibernetike dhe veprime të ngjashme.
Diplomati rus Dmitri Poljanski pretendon se kjo është një tjetër “kryevepër e luftës propagandistike amerikane”. /tesheshi.com/
