Përfaqësuesi i Partisë Popullore Austriake (OVP) në Parlamentin Evropian, Lukas Mandl, vlerësoi se mendimet për anëtarësimin e Ukrainës në Bashkimin Evropian janë të kuptueshme, por theksoi se para se të ndodhë kjo, duhet të pranohen të gjitha vendet e Ballkanit Perëndimor.
“Është e kuptueshme që presidentja e Komisionit Evropian, Ursula von der Leyen, po mendon dhe po flet për anëtarësimin e Ukrainës në BE në situatën aktuale. Megjithatë, para se të ndodhë kjo, të gjashtë vendet e Ballkanit Perëndimor duhet të pranohen përfundimisht. Është një rajon shumë më i vogël që është shumë më i avancuar në pjekurinë e BE-së”, tha Mandl në një deklaratë.
Lidhur me krizën në Ukrainë, ai tha se ata që fillojnë një luftë nuk duhet të jenë të suksesshëm në këtë dhe se detyra e gjeneratës aktuale politike është ta kundërshtojë atë në mënyrë që të mundësojë jetën e brezave të ardhshëm pa luftë.
Njohja e Kosovës
Mandl është zëvendëskryetar i Komisionit për Politikat e Mbrojtjes në Parlamentin Evropian.
“Evropa e meriton unitet. Ukraina meriton solidaritet dhe udhëheqja ruse sanksione me efekt të plotë. Të gjitha institucionet e BE-së duhet t’i kërkojnë urgjentisht Serbisë që të qëndrojë brenda kufijve të gjerë të mundësive evropiane dhe të distancohet qartë nga çdo formë e nxitjes për luftë. Përndryshe, negociatat e anëtarësimit do të ishin një ndërmarrje e pashpresë”, pohon Mandl, i cili është kryetar i shoqatës austriake “Miqtë e Kosovës”.
Ai ka theksuar se ka ardhur koha që ato pesë anëtarë të BE-së, të cilat nuk e kanë bërë këtë deri më tani, ta njohin Kosovën. /tesheshi.com/
