Shtetet e Bashkuara dhe aleatët e tyre do të përgjigjen në mënyrë të bashkuar dhe të vendosur ndaj “sulmit të paprovokuar dhe të pajustifikuar të forcave ushtarake ruse në Ukrainë”, tha presidenti amerikan Joe Biden pasi u dëgjuan shpërthime në kryeqytetin ukrainas Kiev.
“Presidenti Putin ka zgjedhur një luftë me paramendim që do të sjellë humbje katastrofike të jetës dhe vuajtje njerëzore”, tha Biden në një deklaratë të lëshuar të mërkurën vonë, duke shtuar:
“Vetëm Rusia është përgjegjëse për vdekjen dhe shkatërrimin që do të sjellë ky sulm. Bota do ta mbajë Rusinë përgjegjëse.”
Biden tha të enjten se do të njoftonte masat e mëtejshme që Shtetet e Bashkuara dhe aleatët e saj do të vendosin ndaj Rusisë.
Ai shtoi se do të monitoronte situatën nga Shtëpia e Bardhë përpara se të takohej me kolegët e tij nga G7, një grup prej shtatë ekonomish të përparuara, herët të enjten.
Më pas, tha ai, do të “bisedojë me popullin amerikan” për të njoftuar pasojat që Shtetet e Bashkuara, aleatët dhe partnerët do t’i imponojnë Rusisë për këtë “akt të panevojshëm agresioni kundër Ukrainës dhe paqes dhe sigurisë globale”.
Biden tha se Uashingtoni do të koordinohet gjithashtu me aleatët e NATO-s “për të siguruar një përgjigje të fortë dhe të bashkuar që pengon çdo agresion kundër aleancës”. /tesheshi.com/
