Federata e Futbollit të Ukrainës (UAF) i ka kërkuar Federatës Ndërkombëtare të Futbollit (FIFA) që të përjashtojë kombëtaren iraniane nga Kupa e Botës në Katar.
Në shpjegimin e kërkesës, UAF deklaroi se kombëtarja iraniane duhet të dëbohet “për shkak të shkeljes së të drejtave të njeriut dhe përfshirjes së pretenduar të Iranit në agresionin ushtarak të Federatës Ruse kundër Ukrainës”.
Irani është akuzuar se ka furnizuar Rusinë me armë për të ndihmuar pushtimin e tyre në Ukrainë dhe për shkelje të neneve të statutit të të drejtave të njeriut dhe anti-diskriminimit të FIFA-s.
“Duke marrë parasysh rezolutën e Këshillit të Sigurimit të OKB-së për vendosjen e sanksioneve ndaj Iranit dhe përfshirjen e pretenduar të Iranit në agresionin ushtarak të Federatës Ruse kundër Ukrainës, ne i bëjmë thirrje FIFA-s me një propozim për të shqyrtuar përjashtimin e ekipit kombëtar iranian nga Kupa e Botës FIFA 2022”, njoftoi UAF.
Sulmet “kamikaze” në qytetet e Ukrainës
Ukraina njoftoi më parë se Rusia sulmoi qytetet e saj me pothuajse 250 dronë “kamikaze” të prodhuar nga Irani.
Apeli vjen vetëm disa ditë pasi CEO i Shakhtar Donetsk, Sergey Palkin bëri thirrje gjithashtu që Irani të përjashtohet nga Kupa e Botës.
“Instruktorët dhe ushtria iraniane trajnuan dhe drejtuan drejtpërdrejt lëshimin e dronëve që shkatërruan shtëpi, muze, universitete, zyra, fusha sportive dhe kënde lojërash dhe, më e rëndësishmja, vranë ukrainas, përfshirë fëmijë, të cilët gjithashtu ëndërronin të shihnin ekipin e tyre kombëtar në Kupën e Botës”, ka shkruar Palkin në rrjetet sociale.
Në Kupën e Botës, Irani do të luajë në Grupin B së bashku me Anglinë, SHBA-në dhe Uellsin. /tesheshi.com/
