Vetëm pak ditë pasi Rusia njoftoi se do ta pezullonte marrëveshjen e tregtisë së lirë me Ukrainën, kjo e fundit është përgjigjur me të njëjtën monedhë.
Parlamenti ukrainas votoi dje për t’i dhënë të drejtën qeverisë që të vendosë një embargo tregtare kundër Rusisë.
Kryeministri i Ukrainës do të thoshte pak para votimit: “Ne do të mbrojmë tregun e brendshëm të Ukrainës. Rusia ka për të marrë një përgjigje nga qeveria ukrainase në formën e një embargoje tregtare.”
Petro Poroshenko, presidenti i Ukrainës, qe shprehur javën e shkuar se vendi i tij ishte gati të paguante çmimin për marrëveshjen e tregtisë me BE-në, që hyn plotësisht në zbatim më 1 janar të viti të ardhshëm.
Dekreti për pezullimin e tregtisë së lirë me Ukrainën do të nënshkruhej nga presidenti rus Vladimir Putin në mes të dhjetorit. Putini çmonte se vendimi i Ukrainës për t’i hapur kufijtë me BE-në vinte në rrezik interesat dhe sigurinë ekonomike të Rusisë.
Si pezullimi nga Rusia i marrëveshjes së tregtisë së lirë me Ukrainën, ashtu edhe embargoja tregtare me kah të kundërt, pritet të hyjnë në fuqi në ditën e parë të 2016-ës. /tesheshi.com/
