Kremlini e quajti vendimin e 27 vendeve të Bashkimit Evropian për t’i dhënë Ukrainës dhe Moldavisë statusin e kandidatit një çështje të brendshme të Evropës, në mes të ofensivës së Rusisë kundër fqinjit të saj ish-sovjetik.
“Është një çështje e brendshme e Evropës,” u tha gazetarëve zëdhënësi i Kremlinit Dmitry Peskov, duke theksuar se ishte e rëndësishme për Moskën që “i gjithë procesi të mos sjellë probleme shtesë për Rusinë … dhe marrëdhëniet e këtyre vendeve me Rusinë”.
Peskov theksoi se donte që procesi të mos përfundonte me përkeqësimin e marrëdhënieve midis Moskës dhe Brukselit, të cilat tani janë në një nivel kaq të ulët sa që është e vështirë të mos përkeqësohen më tej.
Ai tha se Moldavia dëshiron të bëhet më evropiane se vetë evropianët.
Udhëheqësit e 27 vendeve anëtare morën një vendim historik në Bruksel të enjten për t’i dhënë statusin e kandidatit Ukrainës dhe Moldavisë dhe i premtuan Gjeorgjisë një perspektivë evropiane dhe status kandidat kur të zgjidhë kriteret e mbetura.
Rusia nuk e kundërshton pranimin e Ukrainës në Bashkimin Evropian, por prej vitesh ka kritikuar përpjekjet e këtij vendi për t’u anëtarësuar në NATO prej vitesh.
Përpara se të urdhëronte dhjetëra mijëra trupa të hynin në Ukrainë në shkurt, presidenti rus Vladimir Putin kërkoi garanci ligjore nga Shtetet e Bashkuara se Ukraina nuk do të pranohej në aleancën ushtarake perëndimore. /tesheshi.com/
