Ministri i Jashtëm francez Jean-Yves Le Drian tha se Shtetet e Bashkuara dhe Bashkimi Evropian do të duhet të ndërtojnë “marrëdhënie të reja transatlantike” pas zgjedhjeve presidenciale të SHBA pavarësisht nga rezultati dhe dënoi deklaratat nga Presidenti turk Rexhep Tajip Erdogan për rastin e “Ujqërve Gri|.
“Tani do të na duhet të rinovojmë marrëdhëniet e reja transatlantike, të cilat do të jenë një partneritet i ri,” i tha ministri francez Radio Evropës 1.
Shefi i diplomacisë franceze nuk donte të komentonte mbi zgjedhjet presidenciale amerikane, të mbajtura më 3 nëntor, rezultati i të cilave nuk dihet ende.
“Zgjedhja e presidentit varet nga amerikanët. Pas kësaj, ne do të duhet të punojmë me personin e zgjedhur dhe me qeverinë e re amerikane, pa marrë parasysh se çfarë do të jetë ajo,” tha Le Drian.
Le Drian dënoi gjithashtu deklaratat e presidentit Erdogan, të cilat i cilësoi si “të papranueshme” dhe përsëriti mundësinë e vendosjes së sanksioneve ndaj Turqisë.
Turqia kërcënoi të mërkurën për të “përgjigjur me vendosmëri” për shpërbërjen e “Ujqërve Gri”, një grup ultranacionalist turk në Francë, i cili ka nxitur tensione të reja midis dy vendeve.
“Nuk është vetëm Franca ajo që është në shënjestër, ka një solidaritet të plotë evropian për atë çështje – ne dëshirojmë fuqimisht që Turqia të heqë dorë nga ajo logjikë,” tha Le Drian, duke paralajmëruar se përndryshe ekziston mundësia e sanksioneve. /tesheshi.com/
