Uji është shumë i rëndësishëm për trupin tonë. Në këtë pajtohemi unanimisht, por ja një pyetje në të cilën jo të gjithë bien dakord: Cila është koha më e mirë për të pirë ujë, para apo pas ushqimi?
Shkenca, fatkeqësisht, nuk mund të na japë një përgjigje definitive, ngase studimet se kur është më së miri për të pirë ujë na japin rezultate të ndryshme apo ofrojnë opsione të ndryshme.
Andaj, në vend se të zgjedhim në mes të kampit ‘para ushqimit’ dhe kampit ‘pas ushqimit’, le të shohim të mirat e pirjes së ujit para dhe pas ushqimit. Lexoni dhe gjykoni vetë:
Të mirat e ujit para ushqimit:
Ndihmon në zvogëlimin e kalorive të futura në organizëm: Një numër studimesh ka treguar se pirja e ujit para ushqimit do t’ju bëjë të konsumoni më pak kalori gjatë atyre shujtave. Kjo sigurisht ndodh sepse uji do t’ju bëjë të ndiheni të fryrë, andaj edhe nuk do të ndjeni nevojë të merrni aq shumë ushqim deri sa të ngopeni. Gjithashtu, nëse pini ujë, ju i shmangeni marrjes së pijeve që përmbajnë sheqer.
Uji pastron sistemin tuaj të brendshëm: Sidomos kur merret në mëngjes para kafjallit, uji ofron disa përparësi shëndetësore për trupin tuaj. Uji pastron organizmin tuaj nga toksinat, i ofron stomakut dhe zorrëve tuaja pastrim të mirë, pastron zorrën e trashë dhe ndihmon në balancimin e sistemit limfatik. Në anën tjetër, ndihmon në aktivizimin e organeve të brendshme dhe nxit metabolizmin tuaj, duke e përgatitur për ditën që ju pret përpara.
E hidraton organizmin tuaj të dehidruar: Trupi juaj është dehidruar në mënyrë të natyrshme kur ju zgjoheni pas një gjumi të gjatë. Në këtë mënyrë, mbushja e rezervuarit tuaj është e domosdoshme dhe kjo duhet të bëhet para se ju të hani kafjallin. Në këtë mënyrë, ju do të ndiheni më të freskët dhe do t’ju sigurojë energji natyrale përgjatë gjithë mëngjesit.
Të mirat e ujit pas ushqimit
Ndihmon tretjen e ushqimit, andaj në këtë mënyrë trupi juaj absorbon shumë lehtë nutrientët e nevojshëm.
Andaj, për fund themi: pini ujë kurdo që ndjeni nevojë për ujë – para apo pas ushqimit. /tesheshi.com/
