Tragjeditë në Detin Mesdhe me të pashpresë që lënë vendin e tyre për të mbërritur në Europë përsëriten periodikisht, duke shtuar shifrat e atyre që humbin jetën në këtë rrugëtim.
Në më të fundit incident, mbi 250 persona besohet të jenë mbytur pas gjetjes gjysmë të përmbytura të dy barkave tutje brigjeve të Libisë.
Trupat e pesë të mbyturve janë nxjerrë një ditë më parë pranë këtyre barkave, rreth 30 kilometra larg bregut libian. Të moshës nga 16 në 25 vjeç, meshkuj afrikanë, mendohet që ata të jenë mbytur 24 orë përpara se të gjenden.
Një zëdhënëse e organizatës joqeveritare spanjolle “Proactiva Open Arms”, që mundësoi nxjerrjen e këtyre trupave, deklaroi se mjetet lundruese të përmbytura ishin tipikisht të tilla që mbanin nga 120 gjer 140 njerëz.
Organizata Ndërkombëtare për Migracionin thotë se gjatë nëntë javëve të para të këtij viti në Mesdhe humbën jetën më shumë refugjatë se në të njëjtën periudhë të 2016-s. Nga 1 janari në 9 mars, më së paku 521 njerëz u mbytën teksa rrekeshin të kalonin në kontinentin europian; 471 ishte ky numër në të njëjtën kohë të vitit të shkuar.
Vetëm në ditët e fundit janë shpëtuar më shumë se 6.000 njerëz ndërsa bënin rrugën nga Libia drejt Italisë. /tesheshi.com/
