Organizmi i futbollit europian i ka shprehur keqardhjen skuadrës së Mariborit për humbjen tragjikisht të dy prej futbollistëve të saj të rinj në një aksident automobilistik ditën e djeshme.
“UEFA do të donte t’u dërgonte ngushëllimet e saj NK Mariborit dhe Federatës Sllovene të Futbollit pas vdekjes së parakohshme të martën të dy lojtarëve të Mariborit,” thuhet në një deklaratë të UEFA-s në faqen e saj elektronike.
Gjithashtu, i njëjti institucion i futbollit europian pohoi se para ndeshjes të ditës së enjte mes Mariborit dhe Aberdinit, të vlefshme për raundin e tretë kualifikues të Ligës së Europës, do të mbahet një minutë heshtje në nderim të dy futbollistëve të rinj.
Damjan Marjanovic dhe Zoran Baljak, njëri mbrojtës i majtë e tjetri sulmues, e që të dy njëzet vjeç,
vdiqën dje ndërsa u aksidentuan me makinën e tyre.
Ata po ktheheshin nga stërvitja, e bashkë me ta ishin dhe dy lojtarë të tjerë të rinj. Mbrojtësi slloven Ziga Lipuscek, 19 vjeç, mori plagë të lehta, kurse portieri serb Ljubomira Moravca, një vit më i madh, u lëndua rëndë.
Makina e futbollistëve u përplas me një shtyllë semafori, për t’u ndarë në dysh nga forca e goditjes.
Ngjarja ndodhi dy ditë para se Maribori të ndeshet me Aberdinin. Asnjë prej futbollistëve të përfshirë në aksident nuk qe aktivizuar në takimin e parë, të luajtur në Skoci, e të përfunduar 1-1. /tesheshi.com/
