UEFA ka licencuar stadiumin “Fadil Vokrri” të Prishtinës pas renovimit të tij për zhvillimin e ndeshjeve të Ligës së Kombeve. Këtë e ka bërë të ditur Federata e Futbollit të Kosovës, nëpërmes një deklarate në ueb faqen e tyre zyrtare, ku kanë shkruar:
“UEFA, sot ka njoftuar zyrtarisht Federatën e Futbollit të Kosovës se stadiumi “Fadil Vokrri” në Prishtinë pas renovimit të tërësishëm i ka plotësuar kriteret dhe është licencuar për zhvillimin e ndeshjeve të Ligës së Kombeve. Kësisoj, më 10 shtator, në orën 20:45, Kombëtarja e Kosovës do ta zhvillojë ndeshjen e parë në shtëpi kundër Ishujve Faroe, në kuadër të Ligës së Kombeve, tri ditë pasi do ta bëjë debutimin në këtë garë në Baku, në përballje me Azerbajxhanin”, thuhet në njoftim.
Kosova është në grupin D 3 me Azerbajxhanin, Maltën dhe Ishujt Faroe.
Para ndeshjes me Ishujt Faroe në “Fadil Vokrri” me 10 shtator, Kosova e nis rrugëtimin në Ligën e Kombeve në udhëtim te Azerbajxhani me 7 shtator. /tesheshi.com/
