UEFA vendos të ndërhyjë për të frenuar “çmenduritë” e merkatos në futboll, ku shifrat e frikshme po prishin çdo ekuilibër financiar.
Sipas informacioneve që kanë dalë nga zyrat e organit qendror të futbollit europian, bëhet e ditur se po përgatitet një paketë masash, për të ndalur disi shifrat qindra milionëshe që klubet po hedhin për të blerë lojtarë cilësorë.
Edhe pse çështja është ende në fazën e diskutimit, ajo që po merr formë gradualisht, është një taksë “e majme” që klubi duhet të paguajë për shifra që kalojnë një vlerë “tavan” që pritet të caktohet.
Përvec kësaj, një përqindje e kontratës së nënshkruar mes klubit dhe lojtarit, i mbahen edhe futbollistit.
Po kështu po mendohet që të vendoset edhe një limit për numrin e futbollistëve që një skuadër mund të blejë. Ndërsa nëse një skuadër tenton të kalojë në formë huazimi një futbollist të sajin, tek një klub tjetër, ai duhet të jetë ose një i ri nga akademia, ose një lojtar nën moshën 30 vjeç.
Rregulla në dukje të forta për milionerët arabë e aziatikë që “kanë marrë peng” futbollin. Por a do të kenë ndikim në përmirësimin e sportit më të ndjekur të planetit, kjo mbetet për t’u vërtetuar. Fakt është se kjo merkato nuk po ka limite dhe qindra milion euro po qarkullojnë nga arkat e një klubi në një tjetër. /tesheshi.com/
